அரணும் முரணும்

அரணும் முரணும்

தமாம் பாலா

பாலிருக்க பழமிருக்க

பசி மட்டும் இருக்காது 

பஞ்சணையில் காற்று

வர தூக்கம் வராதென

பாடல் கேட்டது உண்டு

நிஜத்தில் நடக்குமோ

நினைத்துப் பார்க்காத

நிதர்சன சிக்கல் இன்று

சுத்தமானது காற்றும்

மொத்தமாய் மூடியது

கட்டாய முகக் கவசம்

தொட்டால் தொல்லை

பாதைகள் வெறிச்சிட

பயணங்கள் மறக்கும்

பயம் கண் மறைக்கும்

பதுங்கிடல் பாதுகாப்பு

கை சுத்தமான மனிதர்

கை குலுக்கிட மட்டும்

கையாலாகாத நிலை

கை கூப்பும் சூழ்நிலை 

நண்பருடன் செலவிட

நம்மிடம் நேரம் உண்டு

ஒன்று கூடி மகிழ்ந்திட

இன்று காலமில்லை

விதம் விதமாய் உணவு

நிதம் சமைக்க முடியும்

விருந்துக்கு அழைக்க

ஒருவரும் தயாரில்லை

திங்களன்று வேலைக்கு

செல்ல ஏங்கிடும் மனம்

முடிவில்லா சனிஞாயிறு

பிடிவாதமாய் தினமும்

செல்வம் நிறைந்தவரும்

செலவழிக்க இயலாமல்

இல்லாதவர் பிழைத்திட

இல்லையாம் வழிகளும்

கண்ட கனவுகள் இன்று

கனவாகவே போகவும்

காணாத கிருமி ஒன்று

கண்ணாமூச்சி ஆடவும்

உலகம் இன்று மொத்த

முரண்பாட்டின் உருவம்

மருத்துவ பரிசோதனை

மட்டுமே வெற்றியாகும்

ஆலயத்துக்கு

ஆலயத்துக்கு செல்லாதீர்

ஆண்டவன் பாதத்தில் மலர்

தூவி வழிபட அதற்கு முன்

தூய அன்பை கருணையை

உமது வீடுகளில் நிறைப்பீர்

ஆலயத்துக்கு செல்லாதீர்

பலிபீடத்தின் முன் தீபங்கள்

ஏற்றிட அதற்கு முன் கூட்டியே

பாவ கர்வ அகம்பாவ இருளை

அகத்திலிருந்து அகற்றிடுவீர்

ஆலயத்துக்கு செல்லாதீர்

தலைவணங்கி தொழுதிட

அதற்கு முன் சகமனிதருக்கு

தலை வணங்கி இழைத்த

அநீதிகளுக்கு வருந்துவீர்

ஆலயத்துக்கு செல்லாதீர்

முழந்தாளிட்டு இறைஞ்சிட

அதற்கு முன் இல்லாதவன்

ஒருவனை தூக்கி நிறுத்த

தரை நோக்கி தலை குனிவீர்

இளையோரை வளப்படுத்த

அன்றி நசுக்கிட நினையாதீர்

ஆலயத்துக்கு செல்லாதீர்

காலமெல்லாம் செய்த பாவம்

தீர மன்னிப்பு கோரி வழிபட

அதற்கு முன் இதயபூர்வமாய்

உங்களை காயப்படுத்தியவர்

எல்லோரையும் மன்னித்திடுவீர்

சுதந்திர சொர்க்கம்

எங்கே பயமறியாத மனமும்

நிமிர்ந்த தலையும் உளதோ

எங்கே அறிவுடமை மனிதர்

எல்லோருக்கும் பொதுவாக

எளிதில் கிடைக்கின்றதோ

எங்கே உலகமானது சின்ன

சின்ன சில்லுகளாய் மனம்

குறுகிய குட்டிச்சுவர்களால்

பிரிக்கப்படாது உள்ளதோ

எங்கே வார்த்தைகள் சுத்த

சத்திய உண்மையின் அடி

ஆழத்தில் பிறந்திடுமோ

எங்கே தளராத முயற்சி

முழுமை நாடி தன்னிரு

கைகளை விரித்திடுமோ

எங்கே வற்றாத நதியாய்

அறிதலும் புரிதலும் தன்

சுயத்தை பாலை மணல்

துகளாய் சிந்தனையை

தொலைத்த சிற்றறிவில்

இழக்காது இருக்கிறதோ

எங்கே மனம் பரந்ததாய்

விரிந்ததாய் எண்ணமும்

செயலும் சிறந்திட்டதாய்

அமைந்து விடும் அந்த

சுதந்திர சொர்க்கத்தில்

எந்தையே என்னாடும்

எழுந்திடவே அருள்வீர்