அரணும் முரணும்
தமாம் பாலா
பாலிருக்க பழமிருக்க
பசி மட்டும் இருக்காது
பஞ்சணையில் காற்று
வர தூக்கம் வராதென
பாடல் கேட்டது உண்டு
நிஜத்தில் நடக்குமோ
நினைத்துப் பார்க்காத
நிதர்சன சிக்கல் இன்று
சுத்தமானது காற்றும்
மொத்தமாய் மூடியது
கட்டாய முகக் கவசம்
தொட்டால் தொல்லை
பாதைகள் வெறிச்சிட
பயணங்கள் மறக்கும்
பயம் கண் மறைக்கும்
பதுங்கிடல் பாதுகாப்பு
கை சுத்தமான மனிதர்
கை குலுக்கிட மட்டும்
கையாலாகாத நிலை
கை கூப்பும் சூழ்நிலை
நண்பருடன் செலவிட
நம்மிடம் நேரம் உண்டு
ஒன்று கூடி மகிழ்ந்திட
இன்று காலமில்லை
விதம் விதமாய் உணவு
நிதம் சமைக்க முடியும்
விருந்துக்கு அழைக்க
ஒருவரும் தயாரில்லை
திங்களன்று வேலைக்கு
செல்ல ஏங்கிடும் மனம்
முடிவில்லா சனிஞாயிறு
பிடிவாதமாய் தினமும்
செல்வம் நிறைந்தவரும்
செலவழிக்க இயலாமல்
இல்லாதவர் பிழைத்திட
இல்லையாம் வழிகளும்
கண்ட கனவுகள் இன்று
கனவாகவே போகவும்
காணாத கிருமி ஒன்று
கண்ணாமூச்சி ஆடவும்
உலகம் இன்று மொத்த
முரண்பாட்டின் உருவம்
மருத்துவ பரிசோதனை
மட்டுமே வெற்றியாகும்