ஆசிரியர் தினம் 2020
தமாம் பாலா
மாதா பிதா குரு என்றார்கள்
மாதாவால் பிறந்தோம் நாம்
பிதா ஆதரவில் வளர்ந்தோம்
குருவால் முழுமை பெற்றோம்
கை பிடித்து எழுத வைத்தார்
வகை வகையாய் கற்றுத் தந்து
கல்விக் கண் திறந்து வைத்து
கேள்விகள் பல தினம் கேட்டு
சிந்தனையைத் தூண்டி நம்மை
சிறகடித்துப் பறக்க வைத்தார்
கற்றுத் தந்த ஆசிரியர் பலத்தில்
விற்றுக் கொண்டோம் அதிகமான
விலைக்கு சர்வதேச சந்தையில்
தலை நிமிர்ந்த வாழ்வு தந்திட்ட
இலையுதிர்கால ஆலமரங்களை
தலைகுனிந்து வணங்கிடுவோம்
தொற்றுக் காலத்திலும் தளராது
தொலைத் தொடர்பு கல்வியில்
சற்றும் தளராது சாதனை புரியும்
வெற்றி விக்கிரமாதித்தன் போல
அறியாமையாம் வேதாளத்தை
அரிந்து வீழ்த்தும் ஆசிரியருக்கு
அரிதாய் நாம் வாழ்த்துரைக்கும்
அந்த நாள் ஐந்தாம் நாளின்று
