தூய அன்பு

தூய அன்பு
தமாம் பாலா

தாயன்பு தன் பிள்ளையை
தாலாட்டி பாலூட்டி சீராட்ட
சேயன்பு தாய் தந்தையை
சேவித்து நன்றி செலுத்த

உறவுகள் காட்டும் அன்பில்
உறையும் பொது நலத்தில்
உண்டு சுயநலம் துளியாய்
உண்மையான யதார்த்தம்

வளர்ப்புப் பிராணி மட்டும்
அளவிலா எதிர்பார்ப்பிலா
அன்பை மனிதரிடம் தரும்
அதில் இல்லை கலப்படம்

தானாடாவிட்டாலும் தனது
தசையாடும் என்பார் நேச
நாய் ஆடாவிடினும் அதன்
வாய் பேசாவிடினும் வால்

ஆடும் என்பதையும் அறிவீர்
ஈடு இணையில்லாத நன்றி
மிக்க தூய அன்பை போற்றி
தக்க மதிப்பைத் தந்திடுவீரே

பெயரியல்

பெயரியல்
தமாம் பாலா

என்ன தான் இருக்கின்றது
என் பெயரில் என்று தான்
எண்ணி நான் பார்த்தேன்

ஆண் பாலா பெண் பாலா
ஆதார் அட்டையா ஆதிகால
ஆதாம் ஏவாளின் சங்கிலி

அதில் நான் எந்த கண்ணி
அடுத்ததாய் என் குலமும்
அன்னை மொழி இனமும்

மதமும் நிறமும் குணமும்
மணமும் வீடும் வாசலும்
மகிழ்வுந்து வண்டிகளும்

எண்ணம் சொல் செயல்
எதிர்பார்ப்பு ஆசாபாசம்
அன்பு கருணை பணிவு

அதிகாரம் அகங்காரமும்
அற்புத அறிவு கொஞ்சம்
அற்பத் தன்மை அபூர்வ

ஆற்றலும் ஆங்காங்கே
ஆற்றாமை பொறாமை
ஆட்டுவிக்கும் பேராசை

அடுத்தவன் பொருளை
அபகரிக்கும் ஆசையும்
அவ்வப்போது எழுந்து

என் பெயரைச் சுற்றியே
எச்சமிடும் அக்கணத்தில்
எந்தன் பெயருக்குப் பின்

ஒளிந்திருக்கும் அரசியல்
ஒளிர்கிறது பிழைப்புக்கு
ஒட்டகம் போல் நீர் தீவன

வசதிக்கு புலம் பெயர்ந்து
வண்டல் மண் பூமி விட்டு
வளர்த்த சுற்றத்தை விட்டு

காடு மலை பாலை எங்கும்
காசு தேடி நடை உடையும்
காலத்துக்கு ஏற்ப மாற்றி

பெயர் பெற்ற குழுமத்தில்
பெயருக்கு கடமை செய்து
பெயரது நல்லது வேண்டி

உள்ள பெயரை மாற்றியும்
உள்ளத்துக்குள்ளே மாற்றம்
உண்டாகும் வரை இல்லை

உண்மையில் நல்லுயர்வும்
உப்பு பருப்பு ஜாடியின் மீது
உள்ள பெயர் சீட்டை மட்டும்

சர்க்கரை என்று மாற்றினால்
சடுதியில் இனித்திடுமெனில்
சகட்டுமேனிக்கு பெயர்களை

மட்டுமே மாற்றி சாதிக்கலாம்
மளமளவென உயர்ந்திடலாம்
மகிழ்ச்சியும் பெற்றிடலாமே!

முனை

முனை
தமாம் பாலா

வாள்முனையில் வெற்றி
கற்காலம் எழுதும் கோல்
முனை வெற்றி தற்காலம்

கூர்முனைகள் ஓலைகீறி
கூறிய பல போர் முனை
செய்தி மெய் கீர்த்திகள்

யார் முனைந்தாலும் தன்
சீர் தரவே காத்திருப்பாள்
கலை மகள் மலை மகள்

திருமகள் அருள் பெறவும்
திருப்பு முனையாய் வந்து
திகழ்வதாம் முனைப்பும்!

ஒன்று

ஒன்று
தமாம் பாலா

தாமரை இலையின் மேல்
தண்ணீர் துளிகள் போல்
தனித்திருக்கும் மனிதரில்

மழையாய் வந்து பொழிந்து
மண்ணுக்குள்ளே ஊடுருவி
மரத்தின் வேருக்குள் பரவும்

விரல்கள் ஐந்து கை ஒன்று
குரல்கள் பல பாடல் ஒன்று
மனிதர் பல குழுவது ஒன்று

எழுதல் உழைத்தல் நன்று
உழுதல் விளைச்சல் என்று
தழுவும் குறிக்கோள் ஒன்று

வெற்றிக்கு வழியே ஒன்று
பற்றிப் படரும் கொடிபோல்
சுற்றுப்புறத்துடன் நீ ஒன்று

ஒன்றாவிடில் உயர்வில்லை
ஒன்றே நன்றாகும் இன்றும்
என்றும் எங்கும் எப்போதும்

கமர்கட்டு

கமர்கட்டு
தமாம் பாலா

பெட்டி நிறைய வாங்கிய
பால் இனிப்புகள் தந்தது
கசப்பான அனுபவத்தை

கலோரிக் கணக்கறியா
குண்டன் கிராமத்தான்
காசு கொடுத்து நோய்

வாங்குகிறான் என்றே
வேலைக் காரர்களுக்கு
அதிர்ஷ்டம் அவர் பெயர்

எழுதியிருந்தது போலும்
எண்ணியதைத் தின்ன
எளிமையாய் பேச பழக

இல்லை காலம் இன்று
கண்ணாடி ஜாடிக்குள்
கைவிட்டு எடுத்த நாள்

நேற்று, கமர்கட்டுக்கும்
போலியாய் தங்க தாள்
சுற்றி மதிப்புக் கூட்டும்

நாள் இன்று எப்போதோ
மென்ற கமர்கட்டு சுவை
நினைக்கவே இனிக்கும்

ஆத்மாவின் மகுடம்

ஆத்மாவின் மகுடம்
தமாம் பாலா

என்வசம் உள்ள ஆண்டுகளை
எண்ணிப் பார்த்து வியந்தேன்
வாழ்ந்து விட்ட காலத்தை விட
மீதியிருப்பது கொஞ்சம் தான்

கை நிறைய இனிப்பு கொண்ட
குழந்தை போல் உணர்கிறேன்
தின்ன தின்ன இன்பம் முதலில்
கடைசி துண்டின் சுவை நாவில்

முடிவில்லாத சந்திப்புகளிலும்
பல்வேறு விதிகள் வழிமுறை
வெற்றுக் கட்டுப்பாடுகளிலும்
விரயமானது கடைசி நிமிடம்

அகவை வளர்ந்தும் அறிவும்
வளரா அற்பமான மனிதரை
சகித்துக் கொள்ள இயலாது
போனது இப்போது எனக்கு

 எஞ்சியிதோ சொற்ப காலம்
 எனது ஆத்ம தேடலின் சாரம்
 பையில் மிஞ்சிய மிட்டாயும்
 விரல் விட்டு எண்ணிடலாம்

 தன் பிழையை தானே நகும்
 உண்மை முகத்து மானிடரை
 தனது வெற்றியால் ஊதிடா
 மனது படைத்த உத்தமரை

கூடி வாழ்வது என் விருப்பம்
மதிப்பு மிக்க புனித மனிதம்
நேர்மை சத்தியம் நிறையும்
வாய்மை இவை வாழ்வின்

பயன் விளக்கும் தீபங்கள்
வாழ்வின் முரட்டுப்பிடியில்
ஆத்மாவின் மென்வருடல்
இடையில் இதயம் தொடும்

இனியவர் சுற்றத்தில் இதம்
காண்பது எனக்கு அவசியம்
அனுபவ முதிர்வு கொண்டு
செறிவாக வாழும் அவசரம்

சொச்சமுள்ளது தின்பண்டம்
இச்சை தீர்க்கும் தனிச்சுவை
மிச்சம் வைத்திடும் எண்ணம்
துளியும் இல்லை திண்ணம்

இனியவருடன் இணங்கிடும்
நிறைவானதொரு சாந்தியும்
சமாதானமும் இணைந்திடும்
இறுதி முடிவுவே என் இலக்கு

உலகில் ஒன்றுக்கு இரண்டு
வாழ்க்கை உண்டு அவற்றில்
முதலாவது மட்டும் சாசுவதம்
அறிந்திட அடுத்தது பிறக்கும்

நன்றி: My soul has a hat by Mario de Andrade

ஊக்கமது கைவிடேல்

ஊக்கமது கைவிடேல்
தமாம் பாலா

எண்ணியது போல் கை கிட்டாது
எதுவும் சில நேரங்களின் போது
களைத்த காலடிகள் ஊர்ந்திடும்
செங்குத்து மலைப்பாதையாகும்

கரையும் கையிருப்பும் குறையா
கடன் தொல்லைகளும் சூழ்ந்திட
போலிப் புன்னகை முயற்சிகள்
ஏக்கப் பெருமூச்சாக முடிந்திட

கவலைச் சுமை அழுத்தினாலும்
கண நேரம் ஓய்வு கொள்ளலாம்
களம் விட்டு விலகிட எண்ணும்
கழிவிரக்கம் மட்டும் வேண்டாம்

வளைந்து நெளிந்து செல்லும்
வாழ்க்கைப் பாதை சொல்லும்
அனுபவப் பாடங்கள் ஏராளம்
அதில் தோல்வி என்பது வரும்

வெற்றிக்கு ஒரு நாழிகை முன்
வெளியேறும் அவசரக் காரன்
என்றே நம்மை ஏங்க வைக்கும்
எவ்வளவு அடித்தாலும் தாங்கும்

பாறை இன்னும் ஒரே அடியில்
பாளம் பாளமாய் வெடிப்பதில்
உள்ள சூட்சமம் அறிந்தவர்க்கு
உள்ளத்தில் உறுதி நிலைக்கும்

சோர்ந்த மனதினருக்கு கூப்பிடு
தூரத்தில் அமைந்த சொர்க்கம்
புலப்படுவது இல்லை வாய்ப்பும்
கை நழுவி போகும் வரை அதன்

வாசம் கூட தெரிவதில்லை இரவு
நேரம் கண்ட கனவு விடிந்த பின்பு
மாயமாகி விடும் விழித்திருக்கும்
வேளை காணும் கனவே என்றும்

நிலைத்திருக்கும் வெற்றி என்பது
தோல்வி எனும் முட்டை ஓட்டினை
உடைத்து உள்ளிருந்து  வெளியே
உயிர் பிறந்திடும் தேவ ரகசியம்

தன்னம்பிக்கை எனும் ஆதவனை
தமது கை கொண்டு மறைத்திடும்
சன்னமான சந்தேக மேகங்களின்
மின்னும்  வெள்ளி விளிம்பாகவே

இன்னும் கொஞ்சம் பொறுத்தார்
இனிதாய் பூமியையும் ஆள்வார்
வென்றவர் என்றுமே துறந்திலர்
துறந்தவர் என்றுமே வென்றிலர்