கண்ணாடிக்கு
தமாம் பாலா
பெல்ஜியம் நாட்டில் செய்த
முகம் பார்க்கும் கண்ணாடி
ஒன்று எங்களது வீட்டினில்
இருந்தது அந்தக் காலத்தில்
கருப்பு சட்டத்தில் கனமாய்
நாலு ஓரமும் முப்பட்டகமாய்
வானவில் நிறம் காட்டிடும்
மாயக் கண்ணாடி அதனில்
எங்கள் முகம் இளமையாக
எப்போதும் தெரிந்தது அது
எக்கச்சக்க தலைமுடியோடு
எங்களைக் காட்டும் போது
சலூன் சென்று சரி செய்து
தலைவாரி பொட்டு வைத்து
பவுடர் போட்டு நாங்களும்
கண்ணாடியும் வளர்ந்தோம்
ஒன்றாகவே எங்களது தலை
நெற்றியில் மேல் நோக்கிய
கேசம் நரைக்கும் முன்னரே
வயதாகி போனது எங்களது
கண்ணாடிக்கு பாதரசப்பூச்சு
புண்ணான முகம் போலவே
புள்ளி புள்ளியாய் தேய்ந்திட
அள்ளி வீசினோம் வெளியே