தான்
தமாம் பாலா
தான் என்ற தன்னம்பிக்கை
அதனால் தான் வாழ்கிறேன்
வெல்கிறேன் என்பார் சிலர்
தான் என்ற அகந்தையாலே
தலைகால் தெரியாமல் ஆடி
அழிந்தனர் பலர் என்றும் கூட
சொல்லக் கேட்டிருக்கிறோம்
என்ன தான் சேதி இதனுள்ளே
இது தான் சரி என்றும் உண்டா
உங்களுக்கு இடையில் நடக்கும்
சதுரங்கப் போட்டியில் பரமபத
ஆட்டத்தில் சுய அங்கீகாரமாய்
கொஞ்சம் அகங்காரமாய் தான்
இருக்கும் வரை ராணிகளும்
ஏணிகளும் வசமாகலாம் பின்
நிஜத்தை மிஞ்சிய நிழலாகவே
விரலை மிஞ்சிய வீக்கமாகவே
தான் என்பது தலைவிரித்தாட
சொந்த காவலரே பகையாகி
சடுதியில் கொன்றிடுவதுண்டு
பயந்தோடிய பாம்புகள் திடீர்
பலம் பெற்று கடித்திடுவதுண்டு
பளபளக்கும் பட்டு சட்டையாக
பல நேரம் தான் அமைந்திடினும்
அளவில் சிறியதென்றால் அதை
அணிவதே சிரமம் தொளதொள
அளவில் ஊர் பார்த்து சிரிக்கும்
மனிதரில் மட்டுமல்ல தான் அது
இருக்கும் கூட்டில் அவியலில்
மணக்கும் சாம்பாரிலும் உண்டு
தான் இல்லாத போது ரசமானது
தன்னடக்கமே ஒர் சமரசமானது
தங்கமனம் நமது கைவசமானது
